„Ехo од длабочината“ е имерзивен, VR-перформанс од два дела што поетски ја истражува еколошката ранливост на Охридското Езеро. Создаден од транснационален креативен тим од Северна Македонија, Србија, Босна и Германија, делото е инспирирано од уметничкото истражување и личните размисли на осум меѓународни уметници кои учествуваа на уметничката резиденција во Охрид во рамките на проектот ПРОСПЕР.

​

Перформансот започнува со виртуелно патување низ уникатниот подводен свет на езерото, воведувајќи ја публиката во интимна средба со неговите загрозени екосистеми. Потоа преминува во интерактивен ДЕЛ, каде гледачите директно комуницираат со изведувачите, соочувајќи се со еколошките предизвици на регионот и промислувајќи го влијанието на човекот во овој процес.

​

Искуството кулминира со партиципативен чин: секој член на публиката е поканет да испрати лична порака до жителите на Охрид.